sher ke liye maans, gaay ke liye ghaans, pakshee ke liye udanaa, machhalee ke liye tairanaa unakee avashyakta hai aur unako jo chaahiye vo sab prakritik hai aur itane mein ve santusht hain. manushy ke paas bhi shareer hai magar shareer kee saree jarooratein poori ho bhee jayen to bhi vah chain nahin paata hai.
kyon? kyonki manushy kee asalee jaroorat kuchh aur hee hai aur vah itani pyaari hai ki uske liye kaee bhagatsingh hansate-hansate phaansee chad jaate hain, jesus soolee chad jaate hain, sucrates aur meerabai jaise log jahar ka pyaala pee jaate hain, buddh aur mahaveer mahal chhod jaate hain; use main beparavahi kahata hoon, jo prem aur aajadi ke sath aati hai magar bodh ke bina na prem ho sakta hai aur na aajadi.
jab manushy ko bodh nahi hota hai ki vah kaun hai? use kya chahiye? aur jo chahiye vah kaise milega? tab vah agyan-vash; shareer, sanskaar, prakriti, desh, kaal, vaataavaran aur samaj ke prabhav-vash uthee kaamnaon ko hee apanee jaroorat samajh leta hai aur jeevan bhar dar-dar bhatakta rahata hai, magar kaheen bhee chain nahin paata hai. kyon? kyonki paanee ka kaam to keval paanee hee kar sakta hai. bhojan ka kaam to bhojan hee kar sakta hai. vaayu ka kaam vaayu hi karegi.
usi prakaar prem, aajadi, mukti, santushti, bodh aur aanand ki jaroorat ko koi anya vastu kaise poora kar sakati hai. magar agyan-vash manushy inhen vastuon, dhan, pad-pratishtha, bhog, stree-purush, saphaltaon jaisi cheejon mein khojta hai.
